尼木阿琪阿子玛

 ꆀꃅꀉꐔꀊꋨꂷ

ꄸꌺꈌꈬ

------꒜ꁧꒉꋯꃅꈩꆿꏪꅜꅉꇬꆀꀕꃆꂮꁱ

    ꉪꆈꌠꇐꀳꇬ：“ꅪꎔꃭꇤꏂ，ꈤꅐꏦꈿꊿ：ꅪꅝꀨꆺꀵ，ꁬꈹꆰꈹꊿ：ꅪꋋꇤꆽꈯꌠꐥ”ꄷ，ꅇꂷꋋꈨꆹꉪꁍꇁꀿꃀꌌꄉꊂꋊꊁꒆꌋꅪꈧꌠꏭꉙꂘꇬꎷ，ꀊꄶꇢꇑ꒜ꁧꒉꋮꃅꈩꅉꆿꏪꅜꅉꇬꆀꀕꂓꂷꐥ，ꆀꀕꆹꆀꃅꆈꌠꏦꃤꌧꆈꌠꏣꃀꏣꑟꁌꒉꑠꂷ，ꆀꀕꆹꀑꁮꅺꐳꌧꅍꂿꅍꐥ，ꄷꀋꁧ，ꋋꆹꆈꌠꌺꇖꋋꈨꌠꉬꇮ，ꋌꉜꐯꃅꐯꌟꌡꄉꋀꏭꉙꂘꇬꎷꑠꂷꉬ。

   ꆀꀕꆹꇭꀧꀉꒉ，ꋍꀍꑐꀉꎴꈁꌠꌋꆀꑊꂷꃰꇌꈭꂶꌠꐯꋭꐯꀕꋭ。ꋌꃢꈜꈚꏦꆹ，ꀂꄂꀉꆈꈬ，ꆞꑭꀊꐯꇈꐧꀠꏭꆏꀁꃚꃅꑠꑵꈚꇬꎷ，ꋍꃢꈜꈚꏦꌋꆀꃅꇏꂶꄟꆹꐮꐊꐙ。ꋍꑍꋍꂷꋌꉜꌊꀄꊭꃅꄉꀋꋻ，ꋍꑍꋍꂷꋌꉜꌊꀉꒉꃅꄉꑌꀋꋻ。ꋌꏮꇢꇑ꒜ꁧꒉꋮꃅꈩꅉꆿꏪꅝꅉꋋꂷꉜꇬꄡꇗꊨꏦꀁꇬꌡꄉꈁꉜꋽꇵꀕ，ꌞꏯꀋꌒꐆꇬꄹꀋꋻ。

   ꋌꇁꌊꄚꃀꁧꒉꋮꃅꈩꅉꆿꏪꅝꑳꃹꇁꈭꐨꆏ，ꋍꑍꋑꀋꋒꑊꑍꒊꌋꀕ，ꆿꏪꅝꅉꈐꉈꄹꃥꇫꇁꌠꌋꆀꌤꃅꊿꈐꏭꐥꈧꌠꃅꈀꄸꑌ，ꆀꀕꆹꅪꎔꃭꇤꏂꌠꀉꄂꀋꉬ，ꉈꑴꃅꇏꂶꄟꑌꀉꇨꐯꀉꇨꄷꆀꀕꏭꀮꄑꌠꌐꀋꄿꃅꐥ，ꆀꀕꁱꐭꌗꅐꄟ，ꑊꑍꒊꆭꀕ。ꆀꀕꆹꉌꂵꂄꎔꄉꋌꏮꄚꈐꏭꈭꇍꌤꃅꊿꈧꌠꉜꇬꊨꏦꃺꃀꑌꂵꐯꌟ，ꈭꇍꌤꃅꊿꈧꌠꀋꌧꀋꂿꅉꇬꆏ，ꋌꇱꉙꂘꌌꋍꑍꋍꍈꄹꄉꐝꉅ，ꁦꎆꃅꌤꃅꆿꃅꇮꇁ，ꒉꋮꃅꈩꅉꆿꏪꅝꅉꇬꌤꃅꐋꀨꈧꌠꇮꇐꑴꇐꋍꑍꋍꍈꃅꋌꇱꉙꂘꁦꎆꅷꆸꇰꃲ。

    ꀊꅰꃅꊽꉌꂵꇬꃹꅼꌠꆏ，ꐋꀨꈧꌠꌤꑘꇬꀋꌧꑠꊝꅉꇬꋋꆹꑭꀕꋧꀕꃅ，ꌤꑘꋌꐘꈍꃅꀕꇬꆀꃪꇁꃅꂰ,ꐋꀨꊈꏭ꒿ꂘꇬꎷ，ꐋꀨꈧꌠꉬꇮꃅꆀꀕꆹꊿꎔꉌꎔꑌꂷꉬꄷꉉꌐ，ꆀꀕꅿꃅꇏꂶꄟꇬꈴꄉꉜꎼꇁꇬꋋꆹꇯꍝꃅꊿꂂꐚꅿꂷꉬꅊꇈ，ꋌꏮꈀꄸꉜꑌꋌꉜꌊꇨꊨꏣꑟꏭꀋꋌ,ꅇꎔꉐꃨꌌꋀꏭꉙꂘꇬꎷ，ꋌꉌꃀꎭꇁꐒꏣꑍꈤꌩꆽꁱꃅꁱꑴꇬꋌꀂꎬꅧꄷꉉꀋꋻ，ꃅꇏꑽꇐꇬꃅꌊꉾꃪꈧꌠ,ꋌꌋꀕꉪꊇꐋꀨꋍꏅꌠꏭꉙꂘꅷꐺ。

     ꒜ꁧꒉꋮꃅꈩꄉꆿꏪꅝꅉꇬ，ꄹꃥꌋꆀꐋꀨꋍꏅꌠꃅꆀꀕꏭꀮꄑꌠꌐꀋꉆꃅꐥ，ꉪꊇꀋꌧꀋꂿꅉꇬ，ꆀꀕꆹꋍꍈꋍꍈꄹꋌꇤꉪꏭꉙꂘ。

     ꆀꀕꇆ，ꉂꇁꅉꌠꆀꀕ，ꆎꆹꈊꃀꀋꀀꀋꑌꃅꄉꄆꄒꂷꇭꇂꃴꄉ，ꒉꋮꃅꈩꅉꆿꏪꅝꑳꄹꃥꐋꀨꋍꏅꁧꎁꃅꅷꐙꄏꀐꀞ?ꎹꄓꏛꃅꄓꌊꆿꏪꅝꅉꇬꁦꎴꇤꌃꃅꑶꌩꇤꎳ，ꆎꆹꒉꋮꃅꈩꅉꆿꏪꅝꑳꋋꂷꆏꌌꀊꅰꃅꁦꎴꇤꌃ，ꅽꃅꇏꂶꄟꆹꄚꆿꏪꅝꑳꇬꐋꀨꈧꌠꌋꆀꄹꃥꈧꌠꉌꃀꈐꏭꀀꁧꀐꌠ，ꅽꅿꑆꊋꆹꐥꍂꃅꑵꈤꇁꀋꉆꌠꑵꉙꊱꐛꄉꃰꊿꉌꃀꇬꀀꁧꃲ。

  ꃅꑍꋂꄐꄉꐤꁮ，ꃅꉖꅓꇱꄉꐤꁮ，ꀋꋓꀋꉪ、ꀋꌋꀋꏢꃅꀕꐎꉬꁮꆪꑌꇫꈴꁧꀐꅊꇈ，ꆿꏪꅝꑳꇬꄹꃥꀕꌋꈧꌠ， ꆏꏮꉢꉚꑊꑍꒊꌋꀕ，ꉢꏮꆏꉚꊰꁧꇪꉾꀕꃅꎍꌐꃲ！

   ꆎꆹꇯꍝꃅꊿꂂꐚꒉꅿ，ꆀꀕꇊꆏꆹꉹꁌꋍꏅꎁꃅꀉꄂꉪ，꒜ꁧꒉꋮꃅꈩꅉꆿꏪꅝꑳꈐꏭꐋꀨꋍꏅꌠꃅꆏꇱꉙꂘꌌꀑꁮꅺꐳ，ꃀꁧꒉꋮꃅꈩꅉꆿꏪꅝꑳꑷꂿꋋꂷꃅꄉꆏꌌꀑꑊꁤꇅꀕ,ꊿꅽꈭꅽꇍꏮꈧꌠ，ꉢꉜꌊꅽꑱꈐꊿꃺꃀꑌꂵꀋꁧꂛꊨꌡꄉ，ꆏꌧꇐꂿꇐꈧꌠꆏꌌꉪꏭꉙꂘ，ꆎꆹꊨꏦꇨꊨꏣꑟꏭꀋꋌꃅꊽꏯꉈꇬꑓꑣ，ꆏꋍꃢꋑꀋꋒꉠꏯꉙꂘꀊꋨꈨꌠ，ꉢꎺꉌꂵꇬꊐꄉꇬꎷ，ꆀꀕꆏꌌꉠꏯꉙꂘꅇꂷꀊꋨꈨꌠꆹ,ꐥꍂꃅꉢꎺꉠꉌꂵꇬꊐꇬꎷ,ꆏꉉꇬꌺꃰꂷꐥꌠꆏ,ꅇꂷꋍꇬꉉꋍꇬꌗ，ꀉꑳꌺꂷꌟꃅꊿꇱꄉꌓꄡꀖ，ꀊꅰꃅꄡꒉ，ꌺꃰꂷꇫꐥꌠꆏꅇꂷꉉꋭꅉꇬꉉ，ꅇꀋꉉꋭꅉꇬꅇꄡꉉ，ꑠꃅꄉꐥꑳꆏꃶꐚꃅꁦꋠꉬ，ꅽꅇꂷꋋꈨꆹꇯꍝꃅꀋꉬꀋꉆ，ꉈꑴ,ꌺꃰꂷꐥꑲꆏ，ꎆꎹꋚꈹꇮ,ꎆꐥꑲꆏꌤꑞꃅꑌꑞꐛꄎꄷꅇꂷꑠꑌ,ꈁꄽꈨꌌꉠꏯꉙꂘ，ꀃ…ꆀꀕꇆ，ꆎꆹꀋꆏꃅꇬꊎꈏꇤꊋꇤꄉꃀꁧꒉꋮꃅꈩꆿꏪꅝꑳꋋꂷꈐꏮꐋꀨꌋꆀꄹꃥꏭꉙꇁꂘꅇꐚꒉꌟꃅꐔ。

ꉪꊇꐋꀨꋍꏅꌠ，ꆀꀕꃅꐪꑽꑌꋋꈨꌧꌐꇁꀋꉆ，ꃅꇏꂶꄟꉉꌐꇁꀋꉆ，ꃀꁧꑤꒉꋮꃅꈩꅉꈐꏭꐋꀨꋍꏅꌠꃅ，ꅽꏯꈀꎭꀕꀐ！ꈀꎭꀕꀐ！